அறிமுக டி20 கிரிக்கெட்டில் சாதனை படைத்து வரலாறு படைத்த ஆஸி வீரர்
ஆஸ்திரேலியா மற்றும் பங்களாதேஷ் அணிகளுக்கு இடையிலான ஐந்து போட்டிகள் கொண்ட டி20 தொடர் தற்போது வங்கதேசத்தில் நடைபெற்று வருகிறது. இந்த தொடரின் முதல் இரண்டு போட்டிகளை கைப்பற்றிய வங்கதேச அணி 2-0 என்ற கணக்கில் முன்னிலை உடன் நேற்றைய மூன்றாவது டி20 போட்டியில் விளையாடியது.
இந்நிலையில் இந்த போட்டியின்போது மிச்செல் ஸ்டார்க்கு பதிலாக அறிமுகமான வேகப்பந்துவீச்சாளர் நாதன் எல்லிஸ் தனது அறிமுக போட்டியிலேயே டி20 கிரிக்கெட்டில் இதுவரை யாரும் படைக்காத வரலாற்று சாதனையை படைத்து அசத்தியுள்ளார்.
அந்த சாதனை யாதெனில் இந்த போட்டியின் 20 ஆவது கடைசி ஓவரை வீசிய அவர் நான்காவது, ஐந்தாவது மற்றும் கடைசி பந்தில் அடுத்தடுத்து 3 விக்கெட்டுகளை கைப்பற்றி ஹாட்ரிக் விக்கெட் வீழ்த்தி அசத்தினார்.
இதில் குறிப்பிட வேண்டிய விடயம் யாதெனில் இதுவரை எந்த ஒரு பவுலரும் டி20 கிரிக்கெட்டில் அறிமுக போட்டியிலேயே ஹாட்ரிக் விக்கெட் வீழ்த்தியது இல்லை. அந்த ஒரு வரலாற்று சாதனையை தற்போது ஆஸ்திரேலிய அணியின் வீரரான நாதன் எல்லிஸ் படைத்துள்ளார்.ஆயினும் அவுஸ்திரேலிய அணி நேற்றைய போட்டியிலும் தோல்வியை தழுவி தொடரை இழந்தது.
அவரின் இந்த சாதனைக்காக உலகெங்கிலுமிருந்து அவருக்கு பாராட்டுகள் குவிந்து வருவது குறிப்பிடத்தக்கது.
#ABDH
