“இதெல்லாம் அவுட்டே இல்லை.. பந்து எங்கேயோ போகுது”.. கொதித்த ஜெய்ஸ்வால்.. அம்பயர் முடிவால் சர்ச்சை!
நார்தாம்ப்டன் கவுண்டி மைதானத்தில் இங்கிலாந்து லயன்ஸ் அணிக்கு எதிராக நடைபெற்று வரும் இரண்டாவது அதிகாரப்பூர்வமற்ற டெஸ்ட் போட்டியின் முதல் நாளில், இந்தியா ‘ஏ’ அணியின் தொடக்க ஆட்டக்காரர் யஷஸ்வி ஜெய்ஸ்வால் சர்ச்சைக்குரிய முறையில் ஆட்டம் இழந்தார்.
கிறிஸ் வோக்ஸ் வீசிய ஏழாவது ஓவரில், யஷஸ்வி ஜெய்ஸ்வால் எல்பிடபிள்யூ (LBW) முறையில் ஆட்டம் இழந்ததாக நடுவர் அறிவித்தார். 25 பந்துகளில் 17 ரன்கள் எடுத்திருந்த ஜெய்ஸ்வால், நடுவரின் இந்த முடிவால் அதிருப்தி அடைந்தார். களத்தை விட்டு வெளியேறத் தயங்கிய அவர், அம்பயரிடம் பந்து லெக் திசையில், ஸ்டம்ப் லைனுக்கு வெளியே சென்றதாக முறையிட்டார்.
இது பயிற்சிப் போட்டி என்பதால் ரிவ்யூ கேட்க முடியாது என்ற நிலையில் ஓய்வறைக்குத் திரும்பினார். இந்தச் சம்பவம் ஆட்டத்தின் ஆரம்பத்திலேயே ஒரு பரபரப்பை ஏற்படுத்தியது. முன்னதாக, கேன்டர்பரியில் நடைபெற்ற முதல் அதிகாரப்பூர்வமற்ற டெஸ்ட் போட்டியில் யஷஸ்வி ஜெய்ஸ்வால் 24 மற்றும் 64 ரன்கள் எடுத்திருந்தார். முதல் போட்டியில் இந்தியா ‘ஏ’ மற்றும் இங்கிலாந்து லயன்ஸ் அணிகள் இடையேயான ஆட்டம் சமனில் முடிந்தது.
இந்தத் தொடருக்குப் பிறகு, இந்தியா ‘ஏ’ வீரர்கள் சுப்மன் கில் தலைமையிலான மூத்த இந்திய அணியை எதிர்கொள்வார்கள். அப்போது இந்த இரண்டாவது பயிற்சிப் போட்டியின் முதல் இன்னிங்ஸில் சதம் அடித்த கே.எல். ராகுலுடன் ஜெய்ஸ்வால் தொடக்க ஆட்டக்காரராக களமிறங்குவார் என்று எதிர்பார்க்கப்படுகிறது.
ஆஸ்திரேலியாவுக்கு எதிரான பார்டர்-கவாஸ்கர் டிராபியில் ஜெய்ஸ்வால் மற்றும் ராகுல் ஆகியோர் வலுவான பார்ட்னர்ஷிப்பைக் கொண்டிருந்தனர். அந்தத் தொடரில் ஜெய்ஸ்வால் 391 ரன்களும், ராகுல் 276 ரன்களும் குவித்தனர். ராகுல் இங்கிலாந்தில் ஒரு நல்ல டெஸ்ட் ரெக்கார்டை வைத்துள்ளார். அவர் 2018 இல் 299 ரன்களும், 2021 இல் 315 ரன்களும் எடுத்துள்ளார் என்பது குறிப்பிடத்தக்கது.
ஜெய்ஸ்வால் ஆட்டம் இழப்பு இந்தப் போட்டியில் சர்ச்சையாக இருந்தாலும், வரவிருக்கும் போட்டிகளில் அவரது செயல்பாடு இந்திய அணிக்கு ஒரு பெரிய நம்பிக்கையாக இருக்கும்.
